قبل ماتقرأ لازم اقولك ان ده مش ملخص الكتاب، ده شرح للكتاب!

والفرق كبير

في الشرح انا هتكلم عن نقاط كتير اتكلم عنها الكاتب باستفاضة، وهضيف عليها أمثلة وشرح اضافي وتوضيحات من خبرتي وتجاربي في عالم البيزنس، طبعا لا يغني هذا الشرح عن قراءة الكتاب ولكن بعد ما تخلص الشرح وتقرأ الكتاب هتكتشف آفاق جديدة وهتشوف الكتاب بعيون مختلفة، فيالا بينا.

 

كتاب اللمسات الخفية أربع أسس للتسويق الحديث أنا بعتبره واحد من أهم كتب التسويق اللي اتكتب على الإطلاق، واللي بيوضح الكاتب فيه مجموعة أفكار خاطئة عن التسويق وبعد كده بيتكلم الكاتب عن أربع أسس للتسويق الحديث وهما:

 

1. السعر

2. الاسم التجاري

3. التغليف

4. العلاقات

 

شرح المقدمة الرائعة:

 

ابتدى الكاتب المقدمة بدرسين عظام هيغيروا من نظرتك لنفسك وللتسويق.

 

الدرس الاول (كارثة لقب الخبير):

 

كتاب اللمسات الخفية هو تاني كتاب للمؤلف هاري بيكويث بعد كتابه الأول بيع اللامرئي واللي حقق نجاح كبير جدا في شرح بيع الخدمات، ومع كتر المبيعات والشهرة بيجي الغرور!

بيقول هاري إن الناس ابتدت تطلق عليه لقب خبير، والمشكلة في اللقب ده انه بيخليك تتخيل انك عارف كل حاجة، ما انت خبير بقي!

وعشان كده بتبدأ تدور على الاجابات جواك وبس، تبتدي تبطل تبص حواليك وتلاحظ، تبطل تتعلم من غيرك.

وهنا الكارثة.

 

اعرف حد اشتغلت معاه كانت دماغه حلوة جدا ودايما بيطلع افكار كويسة اوي ولما سألته عن سر ابداعه المستمر، قالي القراءة.

كمل كلامه وقال أحلى أفكار بتجيلى وانا بقرأ اي كتاب، بحس إن دماغي عماله تشوف حاجات مشوفتهاش قبل كده، ممكن يكون كتاب مالوش علاقة حتي بالموضوع اللي بفكر فيه، ولكن القراية بتعمل معايا مفعول السحر.

 

“في بحثنا عن رؤي بشأن العمل يمكننا التعلم من بيتر دراكر و فيليب كوتلر ولكن يمكننا التعلم كذلك وبنفس القدر من شكسبير وسائق الأجرة وابنك البالغ من العمر أربع سنوات والذي يستجيب لبعض الألوان ولا يستجيب لأخرى”

 

ده الدرس الأول في التسويق وده اساس الابداع، انك تعرف إن الأفكار موجودة بره

تقدر تتعلم من كل حاجة بتحصل حواليك.

لاحظ الحاجة واسأل نفسك ليه حصلت وازاي استفاد منها، في الفيلم الجميل The.Billionaire بنشوف البطل وهو بيروح السوق عشان يشوف البياعين بيبيعوا ازاي ويقعد يكتب وراهم ملاحظات عشان يحس من طرق بيعه، بالمناسبة الفيلم عن قصة حقيقة ملهمة لشاب عنده ١٨ سنة بقي ملياردير.

 

الدرس الثاني (المنتجات تصُنع والخدمات تُقدم):

 

بيحكي هاري عن حبه لمغنية اسمها لورا نيرو وازاي كانت أغانيها حلوة جدا وانها اول ما نزلت البوم جديد اشتراه بحماس وفضل يسمعه وعشان كده لما عملت حفلة غنائية قرر يروح يحضرها بدون تردد.

 

بس للأسف اتصدم في الحفلة!

“كانت لورا تجلس وجانبها الأيمن نحو الجمهور وظلت على هذا الوضع لا تُحرك شيئا إلا ذراعها، لم تنظر مطلقا نحو الجمهور، لقد غنت كل أغنياتها التي نحبها ولكن برغم أن الأغنيات كانت تبدو تمامًا مثل الأغنيات التي كنا نسمعها من أجهزة التسجيل إلا أننا سمعناها بشكل مختلف كثيرًا”

 

عمرك روحت لدكتور وحسيت انك مش مرتاح؟

وتلاقي نفسك تقول كلام زي الدكتور مش بيسمعني، الدكتور بيقاطعني وكتبلي الدواء على طول.

وبعدين تروح لدكتور تاني وتلاقي التاني قال نفس التشخيص بالظبط وكتب نفس الدواء بالضبط بس انت حبيت التاني أكتر، ليه؟

عشان بيسمعك وبيتكلم بالراحة ويشرح حالتك ويطمنك. 

 

نفس التشخيص ولكن فرق المعاملة والخدمة كان كفيل يحسم الموضوع للدكتور التاني.

 

هو ده الفرق بين الخدمات والمنتجات، الخدمات بنحس بيها أكتر، العملاء مش بيشتروا الخدمة بتاعتنا بس، لا دول بيشتروا التجربة كلها معانا.

 

انا بقدم خدمة استشارات تسويقية للشركات ودايما بحب اسألهم ليه تعاقدوا معايا انا بالذات مش مع شخص تاني؟

والإجابة مكنتش عشان انا اشطر او اذكي( مع ان ده حقيقي 😀 ) ولكن كانت الإجابة على اني شخص مرن، شخص قادر اسمعهم كويس وافهم ظروف شركتهم كويس وبالتالي بصيغ استراتيجيات تناسبهم هما، غيري بيجي يقول التشخيص من غير ما يسمع، يمكن يكون تشخصيه زي ويمكن يكون أفضل في بعض الأحيان، بس الاكيد إن تعاملي الكويس بيرجحني كاختيار للشركات.

 

خليك فاكر لو بتقدم خدمة فأنت كشخص جزء من الخدمة، لو أنت دكتور أو محامي أو مدرس فانت مهما كنت شاطر لكن مش بتعرف تشرح ولا توصل معلومة ولا تعاملك كويس فأنت في خطر، فكر في تجربة عميلك الكاملة وادهاله بشكل ممتع ومبهر.

 

انتهت المقدمة الرائعة وفي المقال الجاي هنتكلم عن اول جزء في الكتاب وهو البحث التسويقي وغلطاته، كتير من الأبحاث بيتعمل بشكل غلط وبالتالي بنوصل لاستنتاجات غلط تماما ممكن تعمل كوارث للبيزنس بتاعنا.

البحث التسويقي هو أساس خطة التسويق واللي بنبني عليها كل حاجة بعد كده فلازم نتأكد انه صح، وفي المقال الجاي هتكتشف غلطات كتير بتعملها وانت مش عارف انها غلطات.

مقال مهم هيغير من نتايجك بشكل جزري

 

اقرأ المقال من هنا: شرح  كتاب اللمسات الخفية أربع أسس للتسويق الحديث للكاتب هاري بيكويث الجزء الثاني