October 23, 2022
بنعمل ايه بعد ما نخلص تسويق؟
متنوع
(ثمانية أعوام انقضت من عمر شركتي وحتى الآن لا أعرف لماذا مازالت صغيرة).
قالها لي صديقي خالد ونحن جالسين على المقهى, ثم أخذ نفسا عميقا من سيجارته ثم أستكمل.
انا كان عندي أحلام وعندي طموح أكبر من اللي وصلتله, انا حاسس اني واقف في مكاني, كل شوية بحس ان الشركة كبرت واقول احنا كده صح وبعدين يحصل حاجة تاني ونرجع زي ما كنا.
التسويق ما بيخلصش ومش هيخلص, وقسم التسويق مش هيخلص شغل, لأنك بعد ما تخلص كل حاجة بيتبقي عندك الجزء الأهم وهو انك تدرس وتحلل وتقيم اللي عملته control and evaluation.
بمعنى انك لما عملت منتج جديد ونزلته السوق دورك كقسم تسويق لسه مخلصش, انت لازم تعرف اراء الناس فيه كمميزات وعيوب وتعرف معلوماتك تانية هتساعدك تقييم خطتك اللي عملتها وطريقة تنفيذها.
لازم تفضل متابع المنافسين وحركة السوق والاقتصاد واللي هيحصل والي ممكن يحصل.
يعني الخلاصة انك لازم بعد ما تعمل أي خطوة انك تحلل الخطوة دي وتشوف هي كانت صح ولا لا ؟.وللأسف الجزء ده مش مفعل في شركات كتيرة جدا, هو افتكر انه خلاص نزل المنتج السوق وخلص على كده, او خلاص عملنا حملة علي الدائري وفي التليفزيون وتمام اوي كده!
وبالتالي هو ميعرفش أسباب نجاحه ولا أسباب فشله الحقيقية, وحتى لو عنده تصور عن أسباب النجاح أو الفشل فهو غير مبني على معلومات وتحليل علمية بل مبني على مجرد آراء ومعتقدات شخصية غالبا هتكون غلط.
خالد لما حد بيروح لدكتور اول حاجة الدكتور بيكون عاوز ياخد تاريخ مرضي معين من المريض, يعني يسأله ياتري دي اول مرة تحس بالصداع ده؟ جالك من امتى وكام مرة؟ في أدوية بتاخدها حاليا؟ وهكذا.
ببساطة يا خالد الدكتور بيعرف الحاجات دي عشان يقدر يحلل ويشخص بيها أسباب مرضك وبالتالي يعرف مرضك وأخيرا يعرف يعالجك صح وده اللي انت بقالك تمن سنين معملتوش خالص.
هل سألت نفسك ايه اكتر نوع خدمات بيطلب من شركتك ولية؟
ياتري العملاء بتوعك يشتروا منك لية؟
مبيعاتك لما زادت زادت ليه ولما قلت كان عشان ايه؟!
ايه هو الكنترول؟
تجميع المعلومات اللي هتفيديك في عملية تحليل الخطوات الي خدتها وبالتالي هتعرف الأسباب الحقيقية للنجاح او الفشل وتقدر تعدل فيها.
لية الكنترول مهم؟
عشان حكاية خالد اللي فوق دي متكررش في شركتك وتبقي عارف انت وصلت فين, رايح فين, هل انت ماشي صح ولا غلط, هل توقعك كان صح فعلا, ياتري ايه العيوب بالظبط في خطتك! ولا ياتري العيب كان في التنفيذ!
ايه اول خطوة عشان انفذ الكلام ده؟
انك تعمل خطة لتجميع الداتا المهمة اللي انت محتاجها عشان بعد كده تحللها عشان تعرف تاخد قرارات صحيحة.
كمثال: مين بيشتري منتجك؟ شباب بنات ورجالة!
مين اكتر شريحة فيهم بتشتري؟
من انهي مكان بالظبط؟
ياتري رايهم ايه عن المنتج وخدمتك؟
هل كان في طلب زيادة عن المنتج أو الطلب كان اقل من المعروض؟
وهكذا
لقد استفاد خالد من كلامي كثيرا وبدا عليه السعادة والحماسة وقال انه سوف يشرع في بحث أسباب نجاحه وفشله ولكن الحقيقة انني كنت أسعد من خالد لانه قرر دفع حساب المشاريب بالكامل!
