ومن الحماس ما قتل:

كلنا عارفين القصة الشهيرة لحد كان عايز يسافر ومستعجل جدا ومعندوش وقت وده خلاه يعمل كل حاجة بسرعة بدون ما ياخد وقته في التخطيط هو محتاج ايه عشان يسافر ويوصل, وفي الآخر سافر بسرعة من غير ما يشوف معاه بنزين قد ايه وعطل في وسط الطريق واتاخر اكتر!

لو بس كان خد من وقته عشر دقايق عشان يستعد للسفر ويحط البنزين كان وصل بدون أي مشاكل.

من اجمل الحاجات في السينما الفترة دي انها قدمت قصص حقيقة كتيرة حصلت وخصوصا قصص نجاح أفراد عاديين زينا وصلوا من الصفر لحاجة كبيرة, ستيف جوبز اتعمل ليه كذا فيلم أفضلهم jobs اللي اتعرض سنة 2013 وتاني افضل فيلم كان Pirates of silicon valley  اللي اتعرض في حياة ستيف جوبز سنة 1999.

فيلم The founder  الي أتقدم سنة 2016 وقدم حياة راى كروك صاحب سلسلة محلات ماكدونالدز  وفيلم The walk  الي قدم مغامرة رهيبة لفيليب بيتيت اللي قدر يمشي على حبل ربطه بين برجين التجارة العالمي في أمريكا وغيرهم من أفلام تانية كتيرة.

العامل المشترك بين كل قصص النجاح دايما بيكون حاجتين مهمين, إرادة قوية جدا بتخلي كل الناجحين دول يكملوا مهما تعرضوا لصعوبات وعقبات وفعل قوي جدا بيخليهم يسهروا بالايام بيتدربوا عشان يحسنوا من نفسهم عشان يوصلوا لحلمهم.

الإرادة بتخليهم شايفين حلمهم وشايفين نفسهم بعد ما حققوا انجازهم الكبير والفعل هو الطريق الي بيخليهم يوصلوا لده.

فعل+إرادة= نجاح.

ومن الحماس ما قتل لأننا شايفين جزء وحيد من المعادلة فقط الحماس أو الإرادة وغافلين تماما عن الفعل, البعض ممكن يقول كمان ان دي حماسة مزيفة لأنها موصلتش للفعل لكن خلينا نفترض فعلا انها حماسة صادقة وحقيقة بس في الاخر مش هتوصلنا لهدفنا لأننا ناسيين الفعل ( البنزين بتاع السفر).

إدوارد دي بونو عالم النفس الشهير صاحب اسهامات ضخمة في علم التفكير وصاحب الكتاب الشهير قبعات التفكير الست بيقول في نفس الكتاب ” إن الإرادة ليست كافية في حد ذاتها بل ينبغي أن يتبعها البدء في تنفيذ الحركات الخاصة في تحقيق الأداء ( الفعل) رويدا رويدا.

علي الهامش إدوارد دي بونو منهجة في التفكير بيتدرس في جامعات كتيرة في العالم وتم استحداث منصب في حكومة فنزويلا اسمة وزير الذكاء والي متبنية منهج دي بونو وتطبيق أفكاره في التدريس والتفكير. 

خلينا نبص لقصص النجاح اللي قولناها في الأفلام الي فوق بداية من ستيف جوبز والي هتعرف لما تقرأ قصة حياته إن كان عنده إرادة قوية لتحقيق حلمه وكان شايف ان المستقبل للكمبيوتر وأن كل بيت هيكون جواه كمبيوتر, أما بالنسبة للفعل فهتلاقي الجملة المشهورة اللي اتقالت فى فيلم جوبز 2013 ” لو كنا عاوزين رؤيتنا تنجح لازم نشتغل بالساعات”.

راي كروك كان عنده الرؤية والإرادة الي خلته شايف قد ايه محلات ماك ممكن توصل للعالمية وكان عنده الفعل عن طريق كلامه مع مستثمرين كتير عشان ياخدوا Franchise لماك ويقدر ينتشر أكتر.

فيليب بيتيت جاتله فكرة أنه يمشي على حبل بين برجين التجارة في أمريكا وفضل يحلم بيها وحط الحلم في الفعل وسافر أمريكا وفضل يتدرب اكتر على المشي على الحبال وازاى يقدر يربط الحبال بطريقة تخليه يمشي عليها بدون ما تتقطع.

وهكذا في كل قصص النجاح منذ بداية الخلق وحتى نهايته هتكون دايما عبارة عن إرادة وفعل.

الفعل من غير الإرادة مش هيوصل للنجاح لانك مع أول عقبة مش هتكون مصر علي حلمك وفكرتك والإرادة من غير فعل هتفضل مجرد أحلام وتخيلات ودي فعلا اكبر مشكلة عندنا وهي أننا بنحلم بس وشايفين ان تكرار العبارات الحماسية هيكون سبب النجاح في حين انك مش هتلاقي حد مستعد يسهر بالايام عشان حلمة ومستعد يسافر ويتعب وهكذا اللهم الي قليل وهما دول الي هيوصلوا.

في كلام كتير تاني كنت ناوي اكتبة في المقال بس معلش مش هلحق لاني مستعجل جدا عشان مسافر وعاوز الحق!