September 21, 2022
شرح كتاب اللمسات الخفية أربع أسس للتسويق الحديث للكاتب هاري بيكويث الجزء الخامس
شروحات الكتب
المقال الخامس من شرح كتاب اللمسات الخفية أربع أسس للتسويق الحديث للكاتب المتميز هاري بيكويث، وفي المقال ده هنتكلم عن تاني أساس وهو العلامة التجارية brand name
هل اسمك التجاري حاجة مهمة؟
هل الاسم التجاري ممكن ينقذ بيزنس من الإفلاس؟
هل العملاء ممكن تشتري منك بسبب قوة اسمك؟
بالتأكيد الاجابة علي كل الاسئلة دي هي طبعًا.
في المقال اللي فات اتكلمنا عن التسعير وازاي قدر السعر العالي يأثر نفسيًا في الناس وتحس ان القهوة اللي بتشربها هي أفضل قهوة حتى لو هي جودتها عادية او كويسة فقط لكن التسعير بيدي ايحاء للعقل انه امام شئ غير عادي.
كذلك الاسم التجاري بالظبط زي ما بيقول هاري في الكتاب ان قوة اسم مطعم بلو فوكس (صاحب القهوة في المثال اللي فوق) هو سبب آخر خلي الناس تشرب القهوة وهي معتقدة انها الافضل.
لسه مش مقتنع؟
طيب شوف المثال التاني اللي ذكره هاري وهو بيتكلم عن شركة استشارات في نيويورك كانت بتحاول تتعاقد مع عميل وقدمت عرض سعر ب ١٢٥٠ دولار، وطبعًا الشركة حست أن المبلغ كبير شويه وقالت انها هتفكر، وفي خلال الوقت ده نجحت الشركة الاستشارية في التعاقد مع عميل كبير جدا وليه اسم كبير ومعروف في السوق.
عارف الشركة اللي كانت بتفكر عملت ايه؟
طلبت التعاقد على طول معاهم لانها حست انهم شركة كويسة بدليل ان في شركة كبيرة معروفة اتعاقدت معاهم!
يسكت بقي بتاع الاستشارات ويتعاقد على طول؟
لا
رفع السعر ل ٢٥٠٠ دولار!
الكلام ده تم في خلال اسبوعين بس، كل القصة دي في خلال اسبوعين بس!
والمفاجأة أن الشركة وافقت على سعر ال ٢٥٠٠ دولار واتعاقدت معاهم.
مجرد انك ربطت اسم شركتك باسم شركة تانية كبيرة ده خلالك تاخد ثقة أكبر وفلوس اكتر كمان، ومن هنا بتيجي قوة الأسماء التجارية، ده مجرد تعاقدت مع اسم قوي خلي الناس تتعاقد معاك فتخيل بقي لو انت نفسك الاسم القوي ايه اللي ممكن يحصل؟
وهنا حابب اناقش نقطة تانية بعيد عن الكتاب ولكنها في نفس الموضوع،وهي ان عادي وكويس انك تشتغل مع شركة ليها اسم كبير براتب قليل شويه، او تتعاقد وتعمل شغل لعميل بمبلغ قليل في مقابل الاستفادة من اسمه التجاري في البورتفوليو بتاعك.
انا في عميل ما اتعاقد معايا وفعليًا انا دفعت فلوس من جيبي عشان اقدر اكمل الديل معاه لاني كنت واخد مبلغ بسيط جدًا، ولكن عشان اسمه القوي ده انا كسبت من وراه اضعاف اللي دفعته من جيبي، الناس وثقت فيا اكتر وتعاقدت معايا اكتر لاني بشتغل مع براند كبير.
طبعًا اعمل الكلام ده بحذر شديد ومش مع اي حد، لان في الاساس احنا بنشتغل عشان ناخد فلوس كويسة، لكن مفيش مانع في بعض الاحيان انك توازن الأمور بين اسم قوي هيتضاف ليك ومبلغ بسيط وبعد كده تقدر تعوض الفرق ده.
ازاي تبني اسم تجاري قوي؟
بيوضح هاري نقطة مهمة جدًا لازم كلنا نعرفها وهي أن الاسم القوي مش بيبتني بالخداع ولا المكر ولا انك تضحك علي العميل وتعمل البحر طحينة، ولا حتى بيتعمل بس بالشو القوي وانك تظهر في الميديا والاعلام.
الاسم التجاري القوي اساسة الثقة، ان العميل يثق فيك وانك تكون قد الوعد اللي بتوعده للعميل بتاعك، ولما ده يحصل والعميل يلاقيك قد الثقة دي، هيفضل عميل وفي علي طول وكمان هيتحول لعميل بيعملك دعايا بنفسه.
مشكلة شركات كتير في أنها بتوعد وخلاص، ولما يحصل حاجة مبتكونش جمب العميل بتاعها ولا توفي بوعدها، هنا ال show والمظاهر مش هتخدع العميل.
عشان تبني اسم قوي اول حاجة تعملها انك تعرف العميل محتاج ايه وتقدم اللي محتاجه وزيادة وتكون قد وعدك للعميل.
هل الاسم التجاري يعتبر من الأصول؟
الأصول اللي الشركات بتمتلكها زي العربيات والأراضي والمصانع وهكذا، ولكن كمان اسمك التجاري يعتبر أصل مهم زي الأراضي ويمكن اكتر اهمية.
الاسم يعني الثقة يعني العملاء اللي بتشتري ومستنيه منتجات وخدمات البراند.
نقطة خادعة:
كتير من العملاء معتقد في قوة اسمه التجاري وولاء العملاء ليه، والدليل بتاعه بيكون تكرار الشراء منه، يعني في عملاء دايمًا بتشتري وتشتري تاني وهكذا.
وده شئ عظيم طبعًا ولكن خلي بالك هما بيشتروا ليه؟
يمكن السبب ان مفيش منافس قريب ليك، ودي واحدة من أخطر المشاكل اللي بتحصل وبسببها بتقفل الشركات، انك تكون شركة ضعيفة وفاكر نفسك قوي ولما يظهر منافس أقوى منك بتظهر وتبان الحقيقة.
نصائح عامة لاختيار اسم تجاري قوي:
هاري بيدي مجموعة نصايح مهمة في فن اختيار الاسامي، ومنها أن لو انت بتقدم خدمات بلاش تختار اسم مرح.
الاسامي المرحة والروشة بتنفع مع شركات اللي بتقدم منتجات اكتر، لكن تخيل انك بتقدم استشارات قانونية أو تسويقية واسم شركتك السلطان أو البرنس.
مهم تحافظ على وقار اسم شركتك لو بتقدم خدمات، وطبعا لكل قاعدة استثناءات ولكن خليك فاكر ان الاستثناء قليل والقاعدة اكتر.
النصيحة التانية:
بلاش اسم عادي ومنتشر
الشركة العالمية
الشركة الرائدة
الأولى!
وهكذا
اسم عادي يعني شركة عادية.
اسم عادي يعني محدش هيفتكره ولا ياخد باله منه لانه مكرر والناس عارفاه وشافته كتير.
اختار المميز دايما.
النصيحة التالتة:
اسم قصير
الامثلة كتير على شركات كانت اساميها طويلة وكبيرة ولكن اختصرتها عشان تطور من نفسها و اشهرهم شركة فيدكس واللي هي اختصار لـ فيدرال اكسبريس.
وكما يقول هاري اختار اسم مش جملة!
الجزء الجاي ده اجتهاد مني ومش في الكتاب:
الكتاب مذكرش خطة عميل تمشي عليها عشان توصل لاسم تجاري قوي، والحقيقة برضو هو مفيش طريقة واحدة تمشي عليها لكن هقولك على حاجات تساعد:
شوف الميزة التنافسية اللي بتقدمها ايه وممكن تساعدك في اختيار اسم، يعني لو بتقدم منتجات عناية بالبشرة طبيعية فانت ممكن تختار حاجة ليها علاقة بالطبيعة.
لازم تبص لعميلك المستهدف هو مين، وهل الاسم هيكون مناسب ليه وثقافته ولا لا.
ادرس كويس اسامي المنافسين عشان تبقي مختلف عنهم.
مفيش مشكلة انك تعمل سيرش على مقترحات مش عشان تقلدها ولكن عشان تلهمك بأفكار تانية تقدر تنفذها.
اعمل عصف ذهني من ناس تثق فيهم وخد رأيهم.
اكتب اي فكرة تجيلك مش لازم تستبعد اي اسم في المرحلة الاولي.
اختار ثيم وابني عليه اسم، يعني اقصد اختار حالة ما ومنها تقدر تطلع بالاسم،يعني انا عاوز البراند بتاعك بيدل على القوة لأنه gym فهختار من اسامي ليها مدلول للقوة.
بلاش اسامي التريند لانها قصيرة،التريند ينفع يكون اعلان لكن مينفعش يبقي اسم تجاري قوي.
وبكده خلص المقال الخامس والأساس التاني من أساسيات التسويق الحديث، وفي المقال التالت هنتكلم عن الأساس التالت وهو التغليف، ويبقي السؤال هو التغليف ده للمنتجات بس؟ ولا الخدمات كمان ممكن تتغلف؟
اقرأ المقال السادس من هنا:
شرح كتاب اللمسات الخفية أربع أسس للتسويق الحديث للكاتب هاري بيكويث الجزء السادس.
