October 3, 2022
دروس في البيزنس من مسلسل House MD
بيزنس شوتس
المشهد الأول:
-لماذا قاتلت من أجلي؟
=أنتِ مريضتي!
الرد البسيط اوي ده في الحوار بيلخص إتقان دكتور هاوس لشغله، مستعد يقاتل عشان حد، ممكن يعرّض نفسه هو للخطر عشان حد.
وده كافي يخليني أفكر.. هو أنا بقاتل عشان شغلي!
إيه اللي بضحي به؟ وإلى أي مدى ممكن أخاطر بنفسي عشان أبقى متقن؟!
الإتقان في الشغل مش رفاهية، وملهاش علاقة بمزاجنا الشخصي، يعني مش عشان المدير ده حلو نبقى متقنين ولو هو وحش نكروت الشغل! الإتقان لازم يتم بغض النظر عن الأهواء.
الإتقان كمان بيتم في العلاقات الشخصية، إتقان علاقتك بصحابك وبفهمك لاحتياجاتهم.
إتقانك في الإهتمام بصحتك الجسدية والنفسية.
إتقان الحياة.
راجع الإتقان في حياتك وفي كل موقف خليك فاكر المشهد ده.. لماذا قاتلت من أجلي؟
المشهد التاني:
-انتوا متفاهمين جدًا في الشغل، انتوا بتكملوا الجمل لبعض، ازاي قررت تمشيه!
=هو مشاه عشان كده!
في حلقة من الحلقات دكتور هاوس بدأ يعين فريق عمل جديد وعشان يختار الأفضل قرر يشغلهم كلهم تحت التدريب معاه لفترة معينة، وكان من ضمنهم العجوز اللي مشي!
حد شاطر، ذكي، بيعرف يوصّل الفكرة وهاوس بيقتنع بيها جدّا، بيكمل كلام هاوس بسهولة، ومع ذلك قرر هاوس إنه يمشيه.
وكان السبب زي ما قريتوا في الحوار، هاوس مش محتاج حد بيفكر نفس تفكيره ويقول نفس كلامه، هاوس محتاج الجديد.
ومن هنا اتعملت إن تكوين فريق العمل الصح بيقوم على الإختلاف مش التماثل.
صحيح لازم يكون في مساحات مشتركة معينة، بس لازم نقاط قوة وإختلاف في التفكير عشان نقدر نكمل الصورة سوا.
خلطة فريق العمل الناجح بتقوم على الاختلاف.
خلطة الجواز الناجح بتقوم على الاختلاف!
دوّر على اللي يكملك مش اللي يكون نسخة منك.
المشهد التالت:
-لا أستطيع التحكم في هاوس مثل كادي!
= كادي كانت تدير هاوس ولا تتحكم فيه وهذا هو الفرق.
الفرق بين دكتور فورمان وهو مدير دكتور هاوس، وبين دكتور كادي ودي برضو كانت مديرة هاوس في فترة ما هو التحكم!
مين قال إنك لازم تتحكم في التيم بتاعك عشان تطلع أحسن ما فيه؟
طيب مين قال إنك تتحكم في ابنك عشان تخليه كويس!
في فرق بين التحكم في العلاقات وإدارة العلاقات!
التحكم بيولد عند والعند هيوصلك لطريق مسدود!
لكن الإدارة فيها موازنة، فيها فهم لطبيعة الشخصية اللي قدامك، فيها فهم لطبيعة عيوب الشخصية قبل مميزاتها، فيها تقبل، وفيها بنحاول نوصّل اللي قدامنا للنجاح وللطريق الصح من غير تهديد دايمًا.
الخلاصة واللي اتعلمته من دكتور هاوس
إنت محتاج اختلاف في فريق العمل عشان تكملوا بعض.
الفرق بين التحكم والإدارة.
إتقان الشغل أخلاقيات لابُد منها.
لو عاوز تقرأ أكتر أنصحك بـ
تشوف المسلسل كله حقيقي.
