المشهد الأول:

-هؤلاء الناس الذين لا يتخيل أحد أنهم قد يفعلون أشياء عظيمة، هم بالفعل من يفعلون أشياء عظيمة.

 

دايما بقول أنا بحب الأشخاص ال weird اللي عارفين إنهم weird.

 دول اللي بيشوفوا الحاجة بطريقة مختلفة عننا، دول اللي بيعرفوا يجيبوا الزاوية التانية، دول أساس كل الاختراعات والتقدم اللي حصل في حياتنا. 

 

بطل الفيلم آلان تورنغ (الأب الروحي للكمبيوتر) شخصية غريبة، مش شاطر اجتماعيًا خالص، بس آلان سبب من أسباب هزيمة هتلر، وتغيير التاريخ واختراع الكمبيوتر!

يمكن عشان غريب! يمكن لو آلان كان شخص عادي اجتماعيًا مكنش التاريخ هيذكره.

لما شوفت إن اللي ورا اختراع الكمبيوتر شخص غريب، بدأت أفكر وأدور على كل اللي زيه، تخيّل لقيت أغلب التاريخ فعلًا اتغير بسبب شخصيات الناس كانت نبذاهم إجتماعيًا لمجرد إنهم مش شاطرين أوي في التواصل مع البشر!

 

مارك زوكربرج مؤسس الفيسبوك هو شخصية غريبة،بيل جيتس مؤسس مايكروسوفت، ستيف جوبز مؤسس آبل، وغيرهم كتير من رجال أعمال وفنانين ومبدعين في كل المجالات.

 

عاوز تعرف سر من أسرار نجاح شركة آبل؟

اسمع كلام ستيف جوبز في إعلان آبل وهو بيقول:

“Here’s to the crazy ones, the misfits, the rebels, the troublemakers, the round pegs in the square holes… The ones who see things differently – they’re not fond of rules. You can quote them, disagree with them, glorify or vilify them, but the one thing you can’t do is ignore them, because they change things… Because the ones who are crazy enough to think they can change the world, are the ones who do”.

ستيف جوبز كان دايمًا بيحاوط نفسه بناس مبدعة واللي هما كانوا في أغلب الأوقات ناس weird.

 

طب يعني إيه أصلًا شخص weird

الشخص الغريب بيكون ضعيف في التواصل اجتماعيًا مع الناس، مبيعرفش دايمًا يتعامل مع البشر وبيميل أكتر لإنه يكون لوحده. وعشان كده الناس بتصنفهم على إنهم ناس غريبة!

وللأسف اللي بيحصل إن الناس بتتنمر عليهم أكتر، بس أنا متأكد إن نفس الناس دي هيجي عليها الوقت وتقول ياريتنا كنا زيهم!

 

لو إنت weird خليك فخور بنفسك، لإنك هتغير العالم. إنت مختلف لكن مش معناه إنك منبوذ أو أقل من أي حد.

شكرًا لكل weird في حياتنا.

 

المشهد الثاني:

-آلان، لا يهم مدى الذكاء الذي أنت عليه، إذا أردت أن تحل معضلتك، لابد أن تحظى بالمساعدة.

 

آلان العبقري مقدرش يعمل حاجة لوحده، صحيح هو فكر لوحده وبدأ لوحده بس الاختراع مكملش غير لما تعاون مع فريقه.

 

حتى لو إنت عبقري زي آلان، لازم تعرف إنك محتاج الناس، مفيش في التاريخ شخص غيّر في البشرية لوحده إطلاقًا، ويمكن ده سر تحول كل أفلام السوبر هيروز الأجنبية لإنها تكون أفلام أبطال مع بعض.

 

زمان كان سوبر مان ينقذ العالم لوحده وخلاص، دلوقتي لازم سوبر مان وبات مان وفلاش وكل فريق ال justice league.

ليا صديق كان شغال مع مدير one man show زي ما بيقولوا، ولما صديقي ده بالتدريج بدأ يغير في شخصية المدير عشان يثق في فريق العمل بتاعه ويديهم مهام أكتر، الوضع اتغير تمامًا، والشركة كبرت تقريبًا الضعف.

 

من أكتر الحاجات الغلط اللي بشوفها من بعض المديرين هي إنهم بيفضلوا يعتمدوا على نفسهم في كل حاجة بحجة أن فريق العمل هياخد وقت أكتر!

 

وده حقيقي فريق العمل هياخد وقت أطول في الأول لأنه لسه بيعمل حاجة جديدة عليه، لكن بالتدريج هيبتدي يبقي أسرع، ده معناه ان الشغل هيبقى ماشى برتم أقل في الأول لكن لو بصيت لقدام هتلاقي نفسك هتوفر وقت أكتر وكمان هتستفاد أكتر من إضافات فريق العمل بتاعك.

اتعلم تشتغل مع الناس وتتعاون معاهم، لإنك محتاجهم، وهما كمان محتاجين لك.

 

المشهد الثالث:

-إنجما ماكينة معقدة للغاية، مشكلتنا أننا نستخدم رجالًا يحاولون اختراقها، ماذا لو كانت هناك فقط ماكينة تستطيع الانتصار على ماكينة أخرى!

 

في فيلم The imitation game كان التحدي إن جيش الحلفاء يفك شفرات الألمان اللي متشفرة بجهاز إنجما، وده شيء صعب جدًا لأسباب كتير، رغم إن الجيش البريطاني قدر يجمع أذكى العقول في العالم عشان يحاولوا يفكوا الشفرات لكن مهما حاول البشر مكنوش قادرين يوصلوا للحل، لحد ما جيه آلان تورنغ وفكر في الموضوع بزاوية تانية خالص.

 

إنجما ده جهاز تشفير، احنا مش محتاجين بشر، احنا محتاجين آلة تحارب آلة!

والجملة دي هي السبب في إني أحاول أفكر في كل حاجة بطريقة مختلفة على قد ما أقدر، لما كنت بقرأ عن الإبداع كان دايمًا المثال المشهور بتاع عاوز تكون مبدع؟ جرب تعكس الجمل.

 

مثال:

الطالب يذهب إلى المدرسة.

العكس هيكون

المدرسة تذهب إلى الطالب!

ومن هنا جت فكرة التعليم المنزلي، وبعدين فكرة التعلم عن طريق الإنترنت.

 

الإبداع بيبدأ إننا نحاول نبص للموضوع من زاوية تانية، زاوية معكوسة قادرة تخلينا نوصل لحلول المشكلة بشكل أفضل.

 

من الطرق اللي بتجيب أفكار مبدعة برضو هي إنك تربط حاجات ملهاش علاقة ببعض، يعني مثلًا كان عمرو سلامة بيشرح النقطة دي ويقولك اكتب في ورقة مثلا ٥ أسماء مختلفة

 و ٥ صفات.

 

مثلًا شجرة وكلب وبحر وطيارة قمر

وصفات مثلًا زي متحرك وثابت وهكذا…

قطع كل كلمة وكل صفة لوحدها ولخبطهم واسحب اي اتنين بشكل عشوائي.

 

هتلاقي مثلا طلع لك كلب ثابت أو شجرة متحركة ودي صفة مش طبيعة إن شجرة تتحرك، وتقعد تفكر وتسأل نفسك طب لو اتحركت هيحصل ايه؟ طب ازاي تتحرك؟ طب ليه تتحرك؟ وهكذا، كل ده هيخلق عندك تخيل لحاجات كتير مكنتش في دماغك أصلًا.

 

دلوقتي عرفنا إن:

• الأشخاص الـ weird هيغيروا العالم خليك ممتن ليهم.

• محدش بيغير العالم لوحده.

• محتاجين نفكر دايمًا بطريقة مختلفة ونعكس اللي بيحصل عشان نوصل للحل.

•  

لو عاوز تقرأ أكتر انصحك بـ

كتاب how to get to great ideas هتتعلم منه الإبداع.

كتاب Leaders eat last عشان التيم ورك.

وشوف فيلم The social network عشان تعرف قصة حياة مارك زوكربرج كشخص غريب.

اقرأ اكتر عن آلان من هنا.