September 26, 2022
دروس في البيزنس من فيلم The founder
بيزنس شوتس
المشهد الأول:
بارتون: ناتاشا أنتِ تعرفين أي شخص أصبحت!
ناتاشا: لا أحكم على الأشخاص بأسوء أخطائهم يا بارتون.
من فيلم Avengers endgame
اه عارف إن دي جملة مش من الفيلم اللي هنتكلم عنه دلوقتي، بس حبيت أبدأ بها عشان تكون درس لينا كلنا عشان ناخد الحلو ونسيب الوحش.
لإني طالما اتكلمت عن شخصية (راي كروك) هندخل في جدال حوالين الأخلاقيات بتاعته، بس حقيقي مش حابب أدخل الجدال ده، أنا بس عايزك تاخد الحلو.
اعرف إن كل الدنيا وكل الشخصيات فيها النص الحلو والنص الوحش، ولو فضلنا واقفين عند الوحش مش هنتعلم حاجة من حد، عشان كده لازم نركز على اللي نقدر نتعلمه، ده المكسب الحقيقي.
ده مهم جدًا في حياتك المهنية، لإن مديرك هيكون فى حاجات حلوة كتير وحاجات وحشه كتير برضو، ولو فضلت مركز على الوحش هتسيب الشغل ومش هتلاقي شغل تاني لإن كل البشر كده،نصين.
طبعًا في ناس الجزء الوحش أكتر من الحلو ومتقدرش تكمل شغل معاهم، لكن انا عاوزك دايمًا تبص للجانب الإيجابي في الشخصية وتسيب الوحش منها.
المشهد التاني:
تفكرين بطريقة كبيرة يا جوان أليس كذلك؟
جوان: وهل هناك طريقة أخرى للتفكير؟
من أول لما (راي كروك) شاف مشروع ماكدونالدز وهو حاسس إن المشروع ده لازم يكبر، وكانت رؤيته إنه هيكون في كل مكان.
أعتقد الرؤية الكبيرة دي هي اللي ساعدته إن ده فعلًا يحصل!
لإن ببساطة ازاي هتوصل لاخر الطريق و انت أصلًا مش عارف الطريق!
هل بتفكر بشكل كبير؟
التفكير بشكل كبير معناه إنك تشوف حلمك ده قادر يوصل لفين بلا حدود!
بعد 5 سنين حلمك هيكون فين، طب وبعد 10 سنين؟ وهكذا.
لأي مدى قادر إنك تتخيل حلمك وقادر إنك تكبره في خيالك.
إنك تقعد تحلم بشكل كبير شيء من أساسيات النجاح.
ليا صديق من وهو في الكلية بيحكي عن حلمه، وعن شركته اللي بيحلم بها، من أيام الكلية وهو مختار اسم الشركة ومتخيل كل حاجة فيها، ولما الشركة جهزت بدأ هو يفكر بشكل أكبر فيها وإنها لازم توصل لـ 100 موظف، ولما وصلت لـ 100 موظف كان بيقعد يكلمني عن هي كمان 5 سنين هتبقي عاملة ازاي، صاحبي ده كان عايش حلمه وبيشتغل عشانه، ووصل بالسلامة ومكمل.
بس خد بالك.. الرؤية حاجة وطريق الوصول حاجة تانية؛ إنت محتاج رؤية كبيرة زي (راي) لكن طرق الوصول مختلفة وممكن تتغير مع الوقت.
وده اللي عمله برضو راي كروك، هو غيّر من طريقة الإدارة والتكنيك اللي بيعمله أكتر من مرة عشان يوصل للهدف والرؤية إن ماكدونلز يكون في كل مكان.
طيب لو معنديش رؤية محددة اعمل ايه؟
كتير بيشتكي انه مش عارف هو رايح على فين، مش عارف هو عايز ايه،مش كل الناس محظوظة كفاية في القصة دي،لكن مش معني كده انك توقف شغل، بالعكس معني كده انك لازم تشتغل أكتر وتجرب حاجات كتير لحد ما يكون عندك رؤية لذاتك.
ومش معني كده برضو انك تفضل مستني الشغف يجيلك عشان تتحرك، مش هيجيلك غير لما تتحرك وتجرب حاجات كتير وتصبر كتير.
المشهد التالت:
–أنت لست في صناعة البرجر، لا يمكن أن تبني إمبراطورية من مجرد سنتات ربح، أنت في صناعة العقارات!
زي ما كنا لسه بنقول، راي كروك كان عنده هدف، لكن كان ماشي في طريق غلط أو صعب، لكن لما سمع من هاري سوني الجملة دي، غير طريقه بالكامل.
مش بس درس تغيير الطريق هنا اللي اتعملته، لكن كمان درس إنك تسمع لغيرك!
هاري سوني قال لراي الكلام ده وهو حتى مش شغال معاه!
ومع ذلك راي اهتم إنه يسمع كلامه وينفذه، وخلاه يشتغل معاه في الشركة!
ستيف جوبز بيقول مش من المنطق إننا نعين الناس الأذكياء ونقولهم يعملوا إيه، إحنا بنعين الناس الأذكياء عشان يقولونا نعمل ايه!
عصر الـ One man show انتهى من زمان، والأنسب لحياتك الاجتماعية والمهنية إنك تبتدي تسمع للناس وتفكر في كلامهم، يمكن يكون صح ويمكن يساعدك تتقدم.
واحدة من المشاكل اننا بنرفض نسمع لغيرنا بشكل رهيب، الشباب شايف ان مديره دايمًا غلط ومش فاهمه وانه مظلوم في الشغل، مع انه فعلًا عنده مشاكل ومديره بيقوله عليها عشان يحسنها،بس للأسف نادرًا لما بنشوف ده فعلًا.
دايما بقول للناس لما مديرك يقولك انك فيك حاجة وحشة جرب تسمعه، وفكر ما يمكن هو صح،هيحصلك ايه لو فكرت بالطريقة دي؟
ممكن تتعلم وتغير حاجة في حياتك،لكن لو رفضت كلامه بدون تفكير هتفضل في مكانك بدون تغير.
مش شرط كلام مديرك وكلام الناس يبقي صح، انا بقولك بس فكر فيه يمكن تلاقيه صح، فكر فيه واركن ال ego على جنب شوية.
فيلم The founder مليان دروس كتير، بس أهمهم:
-
خد الحلو وسيب الوحش من كل حاجة.
-
لازم يكون عندك رؤية ولازم يكون عندك مرونة تغيير الطريق.
-
لازم تسمع للناس اللي حواليك كويس عشان تتعلم.
-
لازم تجرب بيج تيستي عشان تحفة.
لو عاوز تقرأ أكتر انصحك بـ
