المشهد الأول

“أن تعرف أن بذل قصارى جهدك هو الخيار الوحيد.”

الفيلم ده بيحكي قصة نجاح حقيقة لمايكل إدوارد الشهير بـ إيدي.

ظهرت معاني الشغف كلها في قصة إيدي، بداية من الناس اللي قالتله إنه بدأ رياضة القفز على الجليد متأخر جدًا، لحد لما اتحارب من أغلب الناس، بس فضل برضو مكمل في حلمه وشغفه!

بالنسبة لإيدي إنه يبذل كل جهده هو ده الاختيار الوحيد عشان يوصل لهدفه.

الشغف بالنسبة لإيدي خلاه يتدرب أكتر، يقاوم كل كلام الناس، ياخد مخاطر أكبر، يتعلم أكتر، يتحمل كل الكدمات!

ولما بيحبط بيرجع يكمل تاني!

وهو ده معنى الشغف الحقيقي!

للأسف كتير فاكر إن الشغف بيخليك دايمًا متحمس ومبسوط، وده مش صحيح، محمد علي الملاكم العظيم بيقول إنه كان بيكره كل لحظة من لحظات التدريب بس كان بيقول لنفسه اتعب دلوقتي وعيش بطل بعدين.. وقد كان.

هتتعب وإنت عندك شغف برضو، هتمل وتزهق، وهيجي عليك وقت وتكون مضغوط نفسيًا.

خليك فاكر إن الشغف مش إن الحياة تبقي بمبي، الشغف بيخليك تستحمل تعب الحياة!

ونقطة تانية جميلة في الفيلم إنه بدأ اللعبة وهو كبير، ودي برضو من الحاجات الغلط في فهم بعض الناس عن الشغف، مش شرط تلاقي شغفك من وإنت صغير!

مش شرط تبقى عارف أصلًا إيه شغفك، إنت محتاج تجرب حاجات كتير عشان تعرف فعلًا إيه شغفك الحقيقي.

المشهد التاني:

-الشيء الهام في الحياة ليس الانتصار، بل الكفاح.

فاكرين زمان لما كنا بنسمع جملة السر في الرحلة؟

السر في الكفاح ده المهم مش الفوز.

يمكن لأن الفوز هو نتيجة الكفاح، يمكن لأن الكفاح هو اللي بيخلينا ننضج فكريًا ونعرف نكمل طريقنا.

يمكن لأن الكفاح معناه إننا هناخد شغفنا بجد واجتهاد واحنا مُدركين إننا هنتعب عشان نوصل.

زي ما إيدي قال في الفيلم أنا أخذ القفز على محمل الجد جدًا.

لو عندك شغف وموهبة عظيمة ولكن مخدتهمش بجد هيكون صعب توصل لنجاح!

لا شيء أكثر شيوعًا من رجال فاشلون لديهم مواهب.

• وهو ده درس إيدي الحقيقي؛ الشغف هيخليك تكمل رغم التعب، والكفاح هو المهم في الرحلة.

لو عاوز تقرأ أكتر انصحك تسمع التيد توك دي Stop searching for your passion