المشهد الأول

-ولد في قرية كرواتية صغيرة، وكما تقول العائلة كان منتصف الليل بينما احتدمت عاصفة رعدية، فقالوا سيكون ابن العاصفة، وأجابت أمه لا! سيكون ابن النور.

ده مشهد ولادة نيكولا تسلا، فكر الأم مختلف بشكل رهيب وجميل ومبهج، اتعملت فعلًا منها أن كل حاجة ممكن يتشاف فيها جزء إيجابي حتى لو صغير ومحدش شايفه، كل الناس شايفه العاصفة وإنه هيكون ابن العاصفة وهي شافت نور العاصفة!

بالمناسبة والدة تسلا كانت مخترعة وهي اللي شجعته من وهو صغير جدًا على الإبتكار والإختراع.

كل حاجة في الدنيا ليها جانب إيجابي، بس إحنا نبص!

المشهد الثاني

– في البداية لم يرى الحل، ولكنه كان يرى المشكلة

الجملة دي على الرغم من إنها تبدو من البديهيات، إلا إنها واحدة من الجمل المهمة فكريًا.

كتير من الناس بيقف عند المشكلة، ومبيكملش للحل.. يمكن عشان بييأس بسرعة لما مش بيلاقي الحل، فبيقرر يقف!

إنت عندك واحد من أعظم المخترعين وهو تسلا، كان في الأول بس بيشوف إن في مشكلة، لكن كان بيكمل عشان يوصل للحل.

باختصار لو عندك مشكلة فتأكد إن ليها حل، بس اصبر شوية عشان توصل.

المشهد الثالث

-يقول تسلا: هناك الكثير من الأيام التي كنت لا أعلم فيها من أين سأحصل على مقابل لوجبتي القادمة.

من أصعب الحاجات إحساس الاحتياج، سواء نفسي أو مادي، ولكن على الرغم من صعوبته إلا إنه عامل مشترك في قصص نجاح العظماء!

فاكرين فيلم The Pursuit of Happyness لما كان مضطر إنه ينام في الشارع أو في بيوت الإيواء؟

تقريبًا كل ما الرحلة بتكون صعبة كل ما الجايزة في الاخر بتكون أكبر.

لقد كان أبي مدمن كحوليات، أنا لا أخجل من ذلك، لم تكن بيننا العلاقة التي أردت!

الناس تقول لديه الآن عربيات، لكن ما لا يعلمونه أننا عانينا لتحقيق ذلك.

لدي ما لدي الآن لأني ضحيت كثيرًا.

كريتسيانو رونالدو

كده عرفنا أن:

• لما نعرف المشكلة ده نص الحل زي ما بيقولوا.

• كل ما الرحلة تكون أصعب كل ما الجايزة بتكون أكبر.

• ازاي نبص للنُص الإيجابي دايمًا، خليك فاكر إنه ابن النور مش العاصفة.

لو عاوز تقرأ أكتر انصحك بـ

كتاب Elon Musk: Tesla, SpaceX, and the Quest for a Fantastic Future.