بصراحة مينفعش أكتب عن فيلم واحد بس من أفلام عامر خان، هيظل عامر خان بالنسبة لي في مكان لوحده خالص كممثل، عامر خان بسببه عشقت السينما الهندية.

وفي رأي برضو هو السبب في تغيير السينما الهندية من حاجة خيالية جدًا لحاجة واقعية جدًا.

 

تعالوا ناخد كام فيلم حلوين لعامر خان ونفكر فيهم

 

الدرس العظيم من فيلم secret superstar بيتخلص في الجملة دي في الفيلم:

 

-هذا ليس جيتار إينسا، إنه حلم إينسا، وبدون الأحلام لا مغزى لأي شيء، لا النوم ولا الاستيقاظ، لا العيش ولا الموت، أن يحلم المرء لهو أمر طبيعي.

 

عندك حلم؟ لو معندكش يبقي فيه مشكلة، ومقصدش هنا حلم بإنك تكسر الدنيا وتغير العالم، الحلم ممكن يكون أبسط من كده، والتغيير مش شرط يكون في العالم.

ممكن تحلم إنك تكون عايش في هدوء وسلام نفسي وتسعى عشان تعمل كده، وممكن حلمك إنك تخترع حاجة، وممكن حلمك إنك تكتب، مش مهم إيه هو الحلم طالما موجود.  

 

أعتقد عشان كده منير قال لو بطلنا نحلم نموت، ايه الدافع من إننا نصحى كل يوم من غير أحلام!

وتاني بأكد مش حلم تغيير العالم وتكسير الدنيا خالص، ممكن أحلام أبسط من كده بكتير.

المهم نحلم

 

أنا اللى بالأمر المحال إغتوى

شفت القمر نطيت لفوق فى الهوا

طلته ماطلتوش إيه أنا يهمني

وليه مادام بالنشوة قلبي ارتوى

وعجبي..

من رباعيات صلاح جاهين

 

فيلم Dangal  فيه جملة عظيمة جدًا بتقول:

 

لتهزم منافسك عليك بهزيمة خوفك أولًا.

 

كام مشروع وقف عشان خايف؟ كام حلم إتأجل عشان خايف؟ كام حاجة حلوة ضاعت منك عشان خايف!

أكبر عدو لك هو نفسك صح؟

مش هتعرف تحقق حاجة غير لما تهزم خوفك منها.

النفس ممكن تكون خايفة من الفشل، وممكن تكون خايفة من التعب اللي هيحصلها نتيجة الجهد اللي هتبذله عشان تحقق الحلم، لازم تتكلم مع نفسك وتفهمها الصح، لازم تقنعها إنها تجرب، ولازم تعرف إنك هتندم لو محاولتش أكتر من ندمك على فشلك.

 

ياما صادفت صحاب وما صاحبتهمش

و كاسات خمور وشراب وما شربتهمش

أندم على الفرص اللى أنا سبتهم

ولا على الفرص اللى ما سبتهمش..

عجبى !!

من رباعيات صلاح جاهين

 

في فيلم 3idiots بيقول: 

 

عرفت في ذلك اليوم أن قلوبنا جبانة، تحايل عليه دائمًا أيًا كانت المشكلة، أخبره أن كل شيء على ما يرام. All is well

 

اتعلم تطمن نفسك، خد نفس عميق، وإهدى، قول لقلبك إن كل حاجة هتبقى كويسة، قل له إن المستقبل هيكون جميل، وإنك هتقدر توصل لحلمك، عرّفه إنك مش هتستلم لأي ضغط، وإن مفيش مشكلة ملهاش حل.

طمن قلبك واضحك عليه وهتلاقي نفسك متطمن.

 

في الفيلم الرائع لتوم هانكس Bridges of spies كان دايمًا بيسأل الجاسوس اللي هيتحاكم ويقوله انت مش قلقان؟

وكانت الإجابة دايمًا هل القلق سوف يساعد؟!

القلق والخوف من المجهول من أكبر أعدائنا النفسية اللي محتاجين نقف قصادها ونهزمها.

افتكر دايمًا جملة كريستيانو رونالدو

الحاضر هو الأكثر أهمية في الحياة.

 

سهير ليالي و ياما لفيت و طفت

و في ليلة راجع في الضلام قمت شفت

الخوف … كأنه كلب سد الطريق

و كنت عاوز أقتله .. بس خفت

عجبى !!

من رباعيات صلاح جاهين

 

 دلوقتي عرفنا إن:

• قلوبنا جبانة تقدر تتحايل عليها وتطمنها.

• عشان تهزم الصعب لازم تهزم خوفك الأول

• الحلم حق لكل إنسان.

 

لو عاوز تقرأ أكتر أنصحك بـ

كتاب فن اللامبالاة.

الراهب الذي باع سيارته الفيراري