October 3, 2022
دروس في البيزنس من أفلام عالم مارفل السينمائي
بيزنس شوتس
المشهد الأول
-قرارك غير سليم كابتن، أنا أحاول ألا أفرق المنتقمون.
كل شخصية من أفلام عالم مارفل عايزة كتاب لوحدها، اه هي أفلام أكشن وسوبر هيروز وحركات بس البُعد الإنساني في كل فيلم عظيم، خلينا نتكلم عن أهم نقطة حصلت في فيلم captain America civil war
اِلحق السوبر هيروز ماسكين في بعض وبيتخانقوا!
حاجة صادمة بصراحة، بس منها اتعملت إن السوبر هيروز بيغلطوا برضو!
كل واحد فينا ليه فكر وليه نظرة للأمور، وطبعًا بحكم الأفلام فكلهم هدفهم الخير، بس حتى منظورنا للخير ممكن يكون مختلف من واحد للتاني، ده مش معناه إن حد فينا وحش لكن معناه إن حد فينا غلط، وده أكبر درس بشري محتاجين نعرفه.. أنا ممكن أكون غلط بس أنا برضو كويس وبحب الخير.
لو طبقنا ده في علاقتنا ومعارفنا الوضع هيبقى مختلف.
محتاجين نتعلم نميز بين الشخصيات المؤذية والناس اللي بتغلط عشان هما بشر.
وكمان في استراتيجيات البيزنس بتاعتك لازم تتأكد إن في اكتر من طريق سليم ويمكن يكون بعضهم عكس بعض تمامًا بس برضو الاتنين صح، وياما شوفت بنفسي مع عملاء وشركات اشتغلت معاهم أن التضارب في الاراء بيكون مفيد في أوقات كتير وبيدي تنوع للمكان، وان احيانا لما تحاول تبص بعيون اللي قدامك بتتعلم حاجات تانية كتير كانت غايبة على بالك.
المشهد الثاني:
-أستطيع أن أفعل هذا طوال اليوم.
جملة كابتن أمريكا المشهورة لما كان بيدخل خناقة ويفضل يضرب وينضرب من أول السلسلة لحد آخر جزء.
المثابرة!
هتنضرب وتقع وتقوم، وتضرب شوية وتقع تاني وتقوم!
واحدة من أهم سمات الناجحين هي قدرتهم على الاستمرار رغم الفشل اللي بيحصل لهم، وأنا كاتب هنا لفظ فشل وأنا قاصده، لإن ساعتها بنحس فعلًا بالفشل وإن دي النهاية، لكن بعد فترة لما بنكمل بنفهم إن التجارب الغلط اللي قولنا عليها فشل دي هي كانت سر نجاحنا.
هتلاقي قصص الناجحين في العالم كله عبارة عن هبوط شديد وفشل وتعب قبل النجاح، وانك عشان تطلع السماء لازم هتنزل سابع أرض.
المشهد الثالث
-الموت هو ما يعطي الحياة معنى.
في قصيدة انطردي الآن من الجدول بيقول هشام الجخ:
لا شيء يجيء ولا يرحل
ما الورد إذن لو لم يذبل؟
ما الشمس إذن لو لم تأفل.
التضاد ده هو اللي بيدي لكل حاجة معناها وقيمتها، بنقدّر الصحة لما بنتعب، وبنقدر الوقت لما يخلص!
احنا محتاجين نتعلم وندرك قيمة الحاجات الوحشة أو التضاد عمومًا في الحياة، التضاد ده بيخلينا نبقى أحسن فعلًا.
كتير من الناس حالها اتغير لما مرت بظرف صعب، وكتير من اللي عاشوا تجارب أقرب للموت رجعوا للحياة تاني مقدرينها.
حاول لما يحصلك ظروف صعبة أقوى منك تخرج من ده بفايدة وقيمة، وكمان حاول إنك تفضل برضو مكمل في طريقك، لو فضلنا مستنين الظروف تبقى مثالية عشان نبدأ هنفضل مستنين على طول.
دلوقتي عرفنا إن:
التضاد في الحياة هو اللي بيديها المعني.
المثابرة من أسس النجاح.
كلنا بنغلط بس مش كلنا وحشين!
لو عاوز تقرأ أكتر انصحك بـ
العادات السبع للناس الأكثر فعالية.
