اكيد جالك افكار كويسة قبل كده وعجبتك جدًا وقولت هتنفذها وبعد شويه لقيتك نفسك نسيتها صح؟

كلنا اتعرضنا للمشكلة دي كتير والغلط هنا هو اعتمادنا على ذاكرة المخ لحفظ كل المعلومات اللي محتاجينها وده شئ صعب يحصل.

الكاتب ديفيد آلان صاحب الكتاب المشهور كيف تنجز جميع المهام (getting things done) بيقول ان العقل البشري مش اداة لحفط المعلومات.

وعشان كده مهم جدًا ندون الافكار اللي بتجيلنا بشكل دوري، وهنا بنقع في تاني مشكلة وهي ان مفيش نظام قوي نمشي عليه عشان نحتفط بالافكار وبرضو بتضيع مننا.

واحدة من أهم الأسباب اننا بنستخدم كذا وسيلة وطريقة لحفظ الأفكار، شوية في الورق وشوية علي الكمبيوتر في ملفات word وشويه على ابلكيشنز الموبايل.

وحتي لما بنستخدم حاجة واحدة الافكار بتدخل في بعضها وبنلاقي افكار مشاريع داخلة في افكار لعمل اكل حلو على طريقة الشيف الشربيني!

ايه الحلول؟

لازم تعرف ان الناس نوعين:

النوع الأول: بيدون الملاحظات بدون اي تنسيق ورا بعضها، وده بيخليه زي ما قولنا يتوهه وميعرفش يستخدم الملاحظات دي بعد ما تكون كتير.

النوع التاني:بيدون الملاحظات بشكل تفصيلي جدًا وده غالبًا بيستني لما يكون فاضي عشان يقدر يكتبها بالتنسيق التفصيلي وده برضو بينسي الملاحظات.

عشان كده الحل الأمثل هو انك تقسم الموضوع على مرحلتين:

المرحلة الأولى وهي صيد الفكرة:

اول ما تجيلك الفكرة اكتبها على طول في ساعتها، وقف اللي بتعمله واكتبها،اوعي تقول طب هخلص بس اللي بعمله ده واكتب بعدها انا فاكرها في مخي اهو.

اكتبها بشكل سريع وغير منسق على طول، يعني كمثال جاتلك فكرة عن زيادة المبيعات في شركتك عن طريق تقديم خدمة جديدة، ادخل اكتب الفكرة كده زي ماهي حالًا.

شخصيًا بستخدم ابلكيشن google keep عشان احفظ الأفكار بشكل سريع اول ما تجيلي.

المرحلة التانية وهي تظبيط الأفكار:

دي مرحلة كتابة الفكرة بشكل تفصيلي اكتر وتوضيحها، وفي الطريقة دي انا بستخدم برنامج notion

شوية قواعد مهمة بقي عشان تقدر تستفيد من الأفكار اللي بتكتبها:

1. اربط الفكرة بالمشاريع الحالية.

2. اربط الافكار بنواحي الحياة.

يعني ايه الكلام ده؟

الافكار مينفعش تكتب بدون هدف وبدون فعل نقدر نعمله، يعني هدف الافكار والملاحظات اللي بنخدها لما نقرأ كتب مثلا اننا نحطها في الفعل،نعمل حاجة بعد الفكرة دي، مش شرط الحاجة دي تتعمل في الوقت الحالي بس المهم انها لازم تتحط في الفعل.

عشان كده افضل طريقة هي اننا نربط أفكارنا ونربط الحاجات اللي اتعلمناها بالمشاريع اللي شغالين عليها.

بحيث يبقي عندنا كم افكار للفعل والتنفيذ.

طيب لو معنديش مشروع حاليًا يخص الفكرة اللي اتعلمتها؟

هنا بيجي دور تاني مرحلة وهي ربطها ب area ما في الحياة.

في كتابه الجميل building a second brain بيتكلم الكاتب tiago forte عن مفهوم ال PARA.

وهي كلمة لاختصار

Project

Area

Resources

Archives

برضو يعني ايه؟

اول حاجة المنطقة area:

ودي المظلة الكبيرة، يعني عندنا مثلا منطقة اسمها الصحة او العائلة او الشغل.

تحت كل منطقة بيكون عندنا مجموعة مشاريع.

وتعريف المشروع هو حاجة ليها وقت بداية ووقت نهاية.

يعني في منطقة الصحة ممكن يكون عندنا مشروع اننا نتعلم نعمل اكل صحي.

تالت حاجة وهي الموارد وهو ده المكان اللي بنحتفط فيه بالمقالات المهمة والافكار وكل حاجة تخص المشروع والمنطقة دي.

واخيرا الارشيف للمشاريع اللي خلصت.

لو مفيش مشروع احتفظ بالفكرة واربطها بالمنطقة بحيث لما تيجي تحتاجها بعد كده تقدر توصلها.

اخر نصيحة هي انك تاخد الموضوع واحدة واحدة وبالتدريج وبلاش تحاول توصل لافضل حاجة مرة واحدة، ابدا دون وكل ما تنشغل وتلاقي نفسك تبطل تدوين ارجع دون تاني لحد ما تداوم على العادة دي.

لو عايز تعرف اكتر عن ابلكيشن نوشن ممكن تشوف الفيديو ده لاحمد ابو زيد.

Notion | أداة واحدة تنظم حياتك بالكامل