October 23, 2022
ست طرق عملية للتخلص من إدمان السوشيال ميديا
متنوع
أكيد انت حاسس بالمشكلة وتضيع ساعات يوميًا من عمرك في السوشيال ميديا بلا هدف غير انك تعمل scroll down وخلاص.
ويمكن تكون قررت اكتر من مرة انك تقلل استخدامك وتبطل لكن معرفتش.
المشكلة اللي دايمًا بنقولها وهي انك بتعتمد على قوة الإرادة كعامل أساسي عشان تحقق هدفك،والحقيقة إن مهما كانت قوة ارادتنا قوية فهي غير مستمرة معانا على المدى الطويل.
جيمس كلير مؤلف كتاب العادات الذرية بيقول ان احيانا النجاح مرتبط أكتر ب اننا نصعب العادات السيئة عن اننا نسهل العادات الكويسة!
يعني ايه الكلام ده؟
يعني من الافضل اننا نصعب على نفسنا أي عادة سيئة عاوزين نتخلص منها وده أهم وأسرع في تحقيق النجاح من تسهيل العادات كويسة.
يعني كل ما نكون عاوزين نتخلص من عادة وحشه الافضل اننا نصعبها علي نفسنا بحيث نحس ان عملها رخم علي قلبنا وتقيل فنبطل نعملها.
وده افضل مليون مرة من الاعتماد على الارادة كعامل للنجاح وده اللي هنعمله سوا في المقال عشان نتخلص من ادمان السوشيال ميديا.
ست طرق عملية للتخلص من إدمان السوشيال ميديا
١- امسح الابلكيشنز
وده الحل الأصعب وذكرته الأول لأنه أول فكرة بتيجي في دماغ اي حد عاوز يبطل وفعلًا بينجح مع ناس كتير لانها بتيجي تصعب الموضوع على نفسها بالطريقة دي لأنهم لسه هيضطروا يدخلوا يحملوا التطبيق تاني.
لكن انا شخصيا مش بفضل الحل ده يمكن لاني شخصيا بحتاج الابلكيشنز تكون موجودة لاني بستخدمها في شغلي بشكل أساسي ولانها مهمة في التواصل، ومش هدفي اقولك انقطع خالص عن السوشيال ميديا مدى الحياة ولكن انا هدفي اننا نرشد استخدامها ويكون بشكل منطقي وعند الحاجة.
٢-استخدم المتصفح في الدخول عليها
ده بيصعب الموضوع جدًا وبيخليك فعًلا تدخل على تطبيقات السوشيال ميديا لما بتكون ضرورة، لأن تجربة الاستخدام من المتصفح بتكون بطيئة ورخمة وده بيخليك حتى لو دخلت تمل وتخرج بسرعة وده الهدف.
٣-اعمل تسجيل خروج
تقدر تخلي كل الابلكيشن موجودة عادي ولكن اخرج منها وكل ما تحتاج تدخل سجل الدخول تاني،العملية دي برضو مملة ورغم انها تبدو بسيطة جدًا لكن ليها تأثير كبير على تقليل ساعات استخدامنا للسوشيال ميديا.
٤-سيب الموبايل في مكان تاني
الحل ده انا بطبقة خصوصا وانا في البيت وعندي شغل او بقرأ كتاب او اي حاجة تانية عاوز اعملها وهي اني بسيب الموبايل في مكان تاني غير المكان اللي انا قاعد فيه،وصدقوني بكسل اقوم اجيبه وبنساه خالص واركز في اللي بعمله.
٥-سيب شحن الموبايل قليل
والطريقة دي تحديدا بعملها عشان لما اصحي من النوم يبقي الموبايل محتاج يتشحن وكده ابقي مضطر احطه على الشاحن ومستخدموش الصبح، الطريقة دي ساعدتني جدًا في زيادة انتاجيتي اليومية واني ابدأ يومي بشكل نشيط بعيد عن بداية اليوم بشاشة اليكترونية.
كنت اتكلمت قبل كده على عادة واحدة ساعدتني ابدأ يومي بنشاط وكلفتني ٢٠٠ جنية بس ممكن تقراها عنها من هنا:
ازاي زودت إنتاجيتي بحاجة واحدة سهلة
٦-الغي النوتفكيشنز (الإشعارات)
واحدة من الأسباب اللي بتخلينا نمسك الموبايل كتير هي وجود رسايل ونوتفكيشنز بتخلينا عاوزين نعرف فيه ايه ومين باعتلنا ومين عمل لايك، والحل ببساطة انك تدخل تلغي النوتفكيشز كلها وساعتها استخدامك هيقل اوتوماتيك.
ابتدي من دلوقتي اختار وسيلة أو اكتر واشتغل عليهم وخليك عارف ان بعض الناس ممكن بعد فترة ترجع لاستخدام الكتير تاني وساعتها الحل اننا نبتدي تاني من الاول عادي جدًا لكن اوعي تستسلم لإدمان السوشيال ميديا لانه خطر على انتاجيتك وتفكيرك وابداعك وحياتك النفسية كلها.
