-الأساتذة والأطباء والمحامون، لا يتخطون ألف روبية، وهو بلغ 10 ملايين فما الذي يمكن لمشرد أن يعرفه؟

ازاي يقدر متشرد يكسب في مسابقة 10 مليون روبية (عملة الهند) هو ده محور الفيلم من اوله لاخره.

بطلنا شاب صغير في السن، قدم على مسابقة من سيربح المليون في الهند، ووصل انه يكسب المسابقة في وسط ذهول من الناس وشك كبير انه بيغش.

ازاي وصل لده وهو مش متعلم؟

واضح من الجملة إن ناس متعلمة تعليم كويس، بس موصلتش للي وصل ليه ولد متشرد مكملش تعليمه كامل.

ده بيخلينا نفكر هو مين أحسن العلم ولا الخبرة؟

كنا دايمًا لما نتكلم عن العلم وأهميته، بنلاقي الجمل المشهورة بتاعت، العلم مش مهم، ده الحاج فلان الفلاني لا بيعرف يقرأ ولا يكتب وعنده ملايين، أنت عندك ايه يابتاع العلم انت.

خلينا نوضح الأول ايه الغلط في الجملة دي، اولا مينفعش تقارن زمن بزمن مختلف، يعني مينفعش نقول أن رجل الكهف كان عنده كهف أكبر من بيتنا الحالي فيبقى هو أحسن!

في زمن معين فعلا كانت الناس بتعرف تنجح بدون علم وبالاعتماد على خبراتهم بس، بس الكلام ده بقي صعب حاليًا شوية، ده غير اننا منقدرش نقول أن الناس دي متعلمتش خالص، هي اتعملت بس مش من الكتب، هي سمعت من المعلم بتاعها فى الشغل الأول،وسمعت من معلم تاني، وبعدين شافت ولاحظت وفكرت وحللت، وبعدين ابتدوا يمارسوا الكلام ده ويعملوا غلط ويتعملوا من الخبرة، يعني افتراض أن العلم يجي من الكتب بس ده شيء غلط جدًا.

وكمان الناس دي كانت برضو فاهمه بخبرتهم أن الخبرة لوحدها مش كفاية، وأن العلم مهم عشان كده علموا ولادهم أحسن تعليم ممكن.

والشركات بتاعتهم كبرت بشكل أكبر لما مسك الشركات دي جيل الأبناء،وده واقع بنشوفه برضو.

ده مش معناه أنهم مكنوش ناجحين، هما كانوا ومازلوا ناس عظيمة، ولكن ظروف عصرهم غير عصرنا.

حتى طبيعية احتياجنا للعلم نفسه حاليًا اتغيرت، من 30 سنة كنت بتقدم في شغل عشان انت خريج جامعة، بعد شوية بقي لازم انجليزي، وبعدين بقي لازم كمبيوتر، وبعدين بقي لازم soft skills وقدام هيكون في حاجات تانية مطلوبة مننا بشكل أساسي وكانت زمان رفاهيات.

يبقي مينفعش تتخيل إنك في سنة 2020 هتكون معتمد بس على خبرتك.

أوحش نصيحة بشوفها، بص بص سيبك من الكلام ده أدخل جرب بإيدك!

يعني العلم هو الحل؟؟

ليه بس عاوز تمسك في حاجة واحدة وتهرب مني، العلم طبعا هو الأساس اللي هتقدر تبني عليه وتكمل خبرتك، بس لوحده مش هيكون كافي.

تخيل الموضوع كمثال تعليم السواقة، الأول بتتعلم إن ده البنزين، ودي الفرامل، وازاي تجيب الأول والتاني وبعدين تبتدي تسوق.

ولما تيجي تسوق هتلاقي العربية بطلت منك، رغم انك متعلم اهو الأساسيات كلها، بس لازم هتطبل منك.

لو انت دخلت تسوق العربية من غير أساسيات المعرفة دي ممكن تعمل حادثة وممكن متعرفش أصلا تسوقها، ولو انت اتعملت كل الأساسيات دي من غير ما تجرب تسوق بنفسك، هتفضل في مكانك.

العلم والخبرة عاملين لازم يتحطوا مع بعض، وكارثة لو في حد شايف حاجة ضد حاجة، او ان حاجة هتغني عن حاجة.

ممكن نتفق أو نختلف حوالين أنهي أكثر أهمية، بس مفيش حاجة واحدة فيها هتمشي لوحدها.

الخبرة هتديك معلومات معينة انت عرفت تكتسبتها بالممارسة، لكن العلم جاي يديلك خبرة الاف الأشخاص والتجارب.

صحيح بطل الفيلم قدر من خلال خبرته ان يوصل للمكسب،بس خليك متاكد ان لو كان جاله أي سؤال خارج نطاق تجاربه مكنش هيعرف يحاوبه.

كده احنا اتعملنا أن:

• العلم والخبرة بيكملوا بعض مش ضد بعض.

ولو عاوز تقرأ أكتر أنصحك ب:

اسمع اللقطة دي من فيلم Good will hunting 

وهي هتوضحلك المعني الحقيقي بين العلم والخبرة العملية.