October 3, 2022
دروس في البيزنس من فيلم Pirates of Silicon Valley
بيزنس شوتس
المشهد الأول:
-لا يمكننا الحصول على هذا الجهاز يا بيل.
= لا لا أنت لا تسمعني، أنا أحتاج إليه!
جملة بيل جيتس اللي بتبين إصراره في إنه ياخد حاجة هو عايزها ورفضه إنها تروح منه!
أرجوك زي ما اتعملنا في درس the founder بلاش تدخل في الجدال الأخلاقي بتاع إن بيل جيتس سرق أفكار من آبل، خد الحلو وسيب الوحش.
الإصرار عظيم، الإصرار بيخلينا نوصل، خليك مُصر على حاجتك، وخليك فاكر إنك لو فضلت مستني الظرف المثالي يحصل عشان تحقق أحلامك، عمرها ما هتتحقق، لإن الظرف المثالي عمره ما بيجي.
وفي اخر المشهد برضو قدر ياخد اللي هو عاوزه عشان مصر وفضل يدور على حل لحد ما وصل، وهدف الاصرار انه يخليك عمال تفكر في حلول وتدور لكن اكيد مش هتصر وانت قاعد مكانك.
المشهد الثاني:
-هذا ليس مدهشًا فقط، هذا تاريخي، يجب أن يُدرّس في كتب التاريخ، لأن هذه هي لحظة خلق لواحدة من أكبر الثروات في التاريخ.
ده مشهد بين بيل جيتس وبين شركة IBM وهو بيحاول يبيع لهم سيستم ال DOS.
المشهد ده فيه فنون التفاوض والبيع بس بالتمثيل..
هدوء أعصاب بيل جيتس وهو بيكلم واحدة من أكبر شركات العالم في وقتها، وهو يادوب فاتح مكتب صغير.
طريقة حواره وعرضه للمشكلة بشكل سلس وعرضه للحل اللي عند مايكروسوفت بس!
كمان ذكاؤه المالي اللي خلاله يبيع نسخ DOS مرخصة على كل جهاز كمبيوتر ومرضاش يبيع حقوق الملكية بالكامل، عشان تفضل مايكروسوفت محتفظة بيها ويفضل كل جهاز كمبيوتر بيتباع في وقتها مايكروسوفت تكسب منه.
الذكاء والهدوء ده هو السبب في إن بيل جيتس بقى أغنى رجل في العالم.
كتير مننا بيتسرع ماليًا إنه يكسب جنيه مع إنه لو صبر هيكسب 10!
كتير مننا مش بيكون واثق في نفسه، وده بينعكس على كل حياته وشغله وبيخسره كتير.
اتعلم تتكلم عن شغلك، اتعلم مبيعات صح، اتعلم تبقي واثق من نفسك وتعرض خدماتك ومنتجاتك بكل ثقة، لأن ده واحد من أهم أسباب النجاح.
المشهد الثالث:
لماذا حلقت لحيتك؟
= البنوك لا تحب اللحى.
ستيف جوبز المتمرد على الواقع، الفوضوي في شكله ولبسه وكل حياته، قرر يحلق دقنه ويقصر شعره عشان ياخد قرض من البنك عشان يبدأ شركة آبل!
ستيف حاول أكتر من مرة ياخد قرض ولكن حس إنه بيترفض بسبب مظهره، دقن طويلة غير مهذبة، بيروح بشورت وتي شيرت وشبشب للبنك!
ولما فكر عرف انه لازم يتغير.
ودي نقطة محورية مهمة أوي، أنا دايمًا بقول إننا اتقدملنا قصص نجاح الغرب بشكل غلط، اتقدملنا ستيف جوبز اللي ساب دراسته ورمى كراسته وخلاص!
محدش هيقولك إن ستيف جوبز غيّر من نفسه كتير عشان يعدل في شخصيته عشان تناسب مجتمع البيزنس، صحيح هو فضل محتفظ بحاجات كتير تمثل جوهر شخصيته زي التمرد على الواقع ومحاولة تغييره وزي البساطة في الأكل واللبس، لكن قصاد ده غيّر من نفسه حاجات تانية.
والغرب مش هو اللي نقل القصص غلط، احنا اللي اخدنا منها أجزاء معينة تجيب لايك وشير وخلاص!
لازم تتعلم تغير من نفسك وشخصيتك، وتفهم إن الثبات على شيء ده جمود وغلط.
تقدر تقولي اتعلمت من الفيلم إيه؟
استنى انا هساعدك:
الثبات على شيء غلط ولازم تفهم اللي حواليك عشان تتأقلم وتوصل للي عايزه.
الذكاء المالي وقوة التفاوض قادرة تخليك من أغنياء العالم!
الإصرار، الإصرار، الإصرار.
لو عاوز تقرأ أكتر أنصحك بـ
شوف سلسلة inside bill brain اللي بتحكي عن العظيم بيل جيتس.
