October 17, 2022
تسويق الفقاعات ((لماذا خسر روكي ولماذا نخسر؟)).
متنوع
هل تتذكرون the dot com bubble ؟
إذا كنتم لا تعرفون ماذا حدث اقرؤوا السطور التالية واحفظوها عن ظهر قلب:
في عام 1997 ومع إنتشار الإنترنت هرول المستثمرون في الاستثمار بشكل مبالغ فيه في جميع شركات الإنترنت والتكنولوجيا.
ارتفعت أسعار الأسهم بشكل جنوني حتى انهارت ثانية في عام 2002 تقريبا بعد ان ثبت للجميع ان ليس كل الشركات الإنترنت بإمكانها الربح !
ده بيفكرك بحاجة؟!
احنا هنا مش هنتكلم على الأسباب الاقتصادية اللي بتخلي الناس والشركات تفشل بس هنتكلم اكتر عن الأسباب النفسية.
أولا الغرور:
“الغرور بالتأكيد خطيئتي المفضلة” ,,,آل باتشينو في دور الشيطان في فيلم The Devil’s Advocate (1997).
الفرق بين الغرور والثقة بالنفس هو أن الواثق من نفسه بيفكر لما يسمع رأي مخالف هل ده ممكن يبقي صح ولا غلط.
المغرور مبيسمعش أصلا.
الغرور هو اللي هيخلي أصحاب الشركات الناشئة يقفلوا لانهم بيسمعوا لنفسهم بس ومعتبرين انهم فاهمين كل الأمور.
لو فاكرين سلسلة أفلام روكي العظيمة وفاكرين أسباب هزيمة روكي !
الغرور اللي خلاه يبطل تدريب لانه بطل العالم ولأنه يقدر يكسب.
ثانيا الجهل:
“المعرفة أفضل من عدم المعرفة” هيو لوري من مسلسل دكتور هاوس.
الاستهتار بالعلم سمة منتشرة جدا في بلادنا والاعتماد اكتر على الفهلوة, عشان تنجح لازم تسيب الكلية لان بيل جيتس ساب الكلية.
كمان ستيف جوبز مكنش مهتم بالعلم وساب الكلية ودايما كان بيلبس اسود وبنطلون جينز وكوتشى يبقي طريق النجاح معروف.
سيب الجامعة
البس كوتشي
البس جينز
احنا اتقدملنا قصص نجاح الغرب بدون ما يتحكلنا صح هما تعبوا قد ايه.
مين يعرف ان بيل جيتس كان بيبات في مكتبة بالايام وان في أحيان كتيرة كان بينام علي نفسة من كتر الشغل.
السكرتيرة بتاعته بتحكي انه كان بيفضل يشتغل لحد ما يبقي هيقع !
مارك زوكربيرج بينزل كل سنة قائمة بالكتب اللي هيقراها السنة دي.
قولتلي انت اخر كتاب قريته امتي؟!
ثالثا صباح الحماس:
“انظروا لهذا النهار الجميل, انه يجعلني أشعر بالغثيان” بيت ميدلر في فيلم hocus pocus 1993
الشغف والحماس وعافر وملكش حجة واحدة من أشهر الهاشتاجز في الفيسبوك, صحيح مفيش مشكلة في الحماس والشغف والمعافرة بل هي من أساسيات النجاح المطلوبة في أي شيء بس المشكلة الكبيرة في التصور انهم هما دول فقط اساسيات النجاح, وبيحصل مع ده زي ما قولنا تقليل من قيمة العلم وتقليل من قيمة الجودة والالتزام والتواصل وبقيت أساسيات النجاح.
الموضوع مش شخصي خالص ده بيزنس, عشان كده لازم تكون بتفكر في البيزنس مش في شخصك, القصة مش زي ما بنقول بالبلدي فتحة صدر ودراع, هقدر أوصل لاهدافي وهكسر الدنيا عشان انا متحمس وجامد!
خليك متحمس وجامد بس اعرف بقيت أساسيات النجاح.
رابعا المخاطرة:
“احنا خارقين ايه اسوء حاجة ممكن تحصلنا” من فيلم الانميشن الخارقون The Incredibles
الحقيقة حاجات كتيرة وحشة ممكن تحصلك نتيجة المخاطرة, احنا عندنا مفهوم عن رائد الاعمال انه مخاطر من الدرجة الاولى وانه لازم ياخد أي ريسك لان دي طبيعية شخصية رائد الأعمال الناجحة!
يمكن يكون رائد الأعمال عنده ميل للمخاطرة اكبر مع ان في دراسات قالت انه مش اكبر ولا حاجة بس بافتراض انه اكبر هل ده يعني عدم حساب المخاطرة؟
ايوة المخاطرات بتكون محسوبة والطبيعي اننا نحاول نوجد بديل لو المشروع منجحش هنعمل اية!
كتير بيكون مؤمن بمبدأ حرق المراكب العدو من أمامكم والبحر من وراك فلازم تحارب عشان تكسب!
بس في احتمال تموت ومتكسبش!
احسب المخاطرة صح قبل ما تخاطر.
” حضرات السادة الأفاضل نهارنا عسل الفنكوش وصل”
عادل إمام من فيلم واحدة بواحدة.
