October 14, 2022
ازاي زودت إنتاجيتي بحاجة واحدة سهلة
متنوع
سيب الموبايل وقلل سوشيال ميديا وجيب منبه عادي واصحي بدري، هل فعلًا النصايح دي حقيقة وهتغير حياتك ولا مجرد كلام مش واقعي من اليوتيوبرز؟
زي ما انتوا عارفين انا مهتم جدًا بزيادة الإنتاجية ومعرفة كل حاجة تخلينا نعرف ننتج اكتر بدون ضغط وتعب، يعني مهتم بزيادة الفعالية بتاعتنا.
زيادة الفاعلية معناها انك لو اشتغلت ساعة تقدر تعمل في الساعة دي اقصى انتاجية ليك كفرد بجودة عالية، وهي دي محور المشكلة بتاعتنا، احنا بنشتغل ساعات عمل كتير وانتاجيتنا ضعيفة وده بالتالي بيأثر على باقي جوانب حياتنا الشخصية وبنحس بالتقصير مع أهلنا وأصحابنا وكمان بيكون علينا ضغط نفسي.
عشان كده قعدت فترة ابحث في الكتب واليوتيوب والمقالات على حلول مختلفة للمشكلة دي ومن ضمن الحلول الشهيرة طبعًا هي تقليل السوشيال ميديا، بس قبل ما نتكلم عن الحلول الشهيرة دي هنتكلم عن حل شدني جدًا اني اجربه فترة وهو حل المنبه العادي!
في فيديو لطيف ل Niklas Christl اتكلم فيه عن الاقتراح ده وتأثيره على حياته، فقررت اجرب ونزلت جبت منبه ديجتال عادي عشان اعرف منه الوقت واظبطه على الصحيان ومستخدمش الموبايل.
ايه اللي بيحصل لما نستخدم الموبايل كمنبه؟
اللي هيحصل اننا بنسبة كبيرة هنصحي واول حاجة نعملها هي اننا نبص في الموبايل ونلاقي نوتفكينشز من السوشيال ميديا وده طبعًا هيخلينا نفتح ونتفرج، وفجأة بدل ما تصحي بنشاط هتلاقي نفسك ضيعت من ٣٠ ل ٦٠ دقيقة على السرير عمال تقلب في صفحات السوشيال ميديا بلا هدف.
طبعًا سامعك يالي هتقول لا انا هظبطه وابقي قافل النت،أو لا انا هقدر أقاوم ومضيعش وقتي في الموبايل،والحقيقية لو انت كده فعلًا ف انا بحييك على ارادتك دي، ولكن في الواقع أغلبنا مش كده، أو انا شخصيًا مش كده، والإنسان ضعيف.
زمان كنا بنسمع مثال شعبي بيقولك متحطش البنزين جمب النار، وده قمة النضج والفهم لطبيعتنا الانسانية، اوعى تعتمد على قوة الإرادة لانها هتنفعك مرة وهتخونك مرات، والصح انك تبعد عنك كل مشتت.
طيب انا عملت ايه بالظبط وفرق معايا في ايه؟
انا بقيت بنام وبسيب الموبايل بدون شحن وبظبط المنبه عادي،طبعا بصحي ابقي نفسي امسك الموبايل لكن للاسف مقدرش لانه بيكون هيفصل شحن ولازم اشحنه،لاحظ هنا اني اجبرت نفسي اني فعلا ممسكش الموبايل عن طريق عدم شحنه مش عن طريق الإرادة.
ثانيا لما بصحي من النوم على المنبة العادي، بقوم اشرب قهوتي في البلكونة واشم شوية هوا وبعدين اخد الشاور بتاعي عادي.
هل ده بقي فرق فعلًا في اي حاجة؟
جدًا جدًا جدًا
ببساطة لما كنت بصحي وامسك الموبايل غير تضيع الوقت كنت ببدأ يومي وانا مصدع نتيجة ان اول حاجة عنيا شافتها هي الشاشة وكمان بكمل باقي اليوم حاسس بصداع او زنة بسيطة في دماغي، واللي اختفت تمامًا لما استخدمت المنبه العادي.
كمان بقيت بحس اني نشيط اكتر او مقبل على الشغل اكتر، وده مش خداع للنفس ده ليه سبب واقعي، وهي اني بدأت يومي بدون أخبار وبدون تفاصيل، بدأت يومي بالتركيز عليا انا مش على الناس على السوشيال ميديا وهما عملوا ايه.
هل واظبت على طول؟
كالعادة طبعًا وقعت في أيام وبقيت اصحي ابص على الموبايل سريعًا او اقول لنفسي عشان افوق أسرع او اي حجة بضحك بيها على عقلي، وطبعًا يومي باظ بسبب ده تاني.
ولكن كل ما كان يبوظ فترة أرجع أحاول تاني وابدء عادي من الأول.
هكلمكم في مقال تاني ان شاء الله عن البعد عن السوشيال ميديا والصحيان بدري وغيرها من العادات المفيدة اللي جربتها شخصيًا.
عاوزكم بعد المقال تشتروا منبه عادي ويفضل يكون ديجيتال عشان صوته ميبقاش مزعج في الصحيان، جربوا الكلام ده لمدة أسبوع، الصحيان بدون سوشيال ميديا وبدون موبايل وابعتولي النتايج بتاعتكم وفرق معاكم ازاي عشان نشارك تجاربنا مع الناس.
